எனது முதல் கட்டுரை

இந்தப் படத்தில் நீங்கள் காண்பது அடியேன் முதன்முதலாக எழுதிய கட்டுரையாகும். ‘இஸ்லாமிய தஃவாவை முன்கொண்டு செல்வதில் ஆலிம்களின் வகிபங்கு’ எனும் தலைப்பில் அரபு மொழியில் அதனை யாத்திருந்தேன். மக்காவில் உள்ள முஸ்லிம் உலக அமைப்பு (Muslim World League) தனது வாராந்த அரபு பத்திரிகையான ‘அக்பார் அல்-ஆலம் அல்-இஸ்லாமி’ல் 1988.07.04 அன்று இந்தக் கட்டுரையை பிரசுரித்திருந்தது.

மேற்படி கட்டுரையை நான் எழுதியதும், அது பத்திரிகையில் வெளிவந்ததும் நான் மத்ரஸாவில் தரம் நான்கில் பயின்றுகொண்டிருந்த காலப் பகுதியிலாகும். அக்பார் அல்-ஆலம் அல்-இஸ்லாமி ஒரு சர்வதேச தரம் வாய்ந்த அரபுப் பத்திரிகை. பல்கலைக்கழக கற்கைகள் அல்லது அவற்றுக்கு நிகரான கற்கைகளைப் பூர்த்திசெய்தவர்களின் கட்டுரைகளுக்கு மாத்திரமே அக்காலத்தில் இடமளிக்கும் அந்தப் பத்திரிகை ஒரு சின்ன கல்லூரி மாணவனுடைய கட்டுரையை முக்கிய இடம்கொடுத்து ஒரு முழுப் பக்க கட்டுரையாக பிரசுரித்திருந்தமையைக் கண்டபோது முதலில் என்னையே நான் நம்பவில்லை. நான் என் கைப்பட எழுதி அனுப்பிவைத்த அக்கட்டுரையில் ஒரு வரியைக்கூட குறைக்காமல், திருத்தம் ஏதும் செய்யாமல் பொருத்தமான படங்களும் இணைத்து பிரசுரித்தனர். ஆனால் என் பெயர் மட்டும் அதில் வெளியிடப்படவில்லை. இது தவறுதலாக நடந்ததா அல்லது இந்தப் பத்திரிகையில் எழுதும் அளவுக்கு எதிர்பார்க்கப்படும் தகுதி இந்தக் கட்டுரையாளரிடம் இல்லை என்பதனாலா என்பது தெரியவில்லை. பெயர் குறிப்பிடப்படாமை குறித்து பத்திரிகை ஆசிரியருக்கு அப்போதே எழுதினேன். ஒன்றும் நடக்கவில்லை.

அக்பார் அல்-ஆலம் அல்-இஸ்லாமி கட்டுரைகளின் உள்ளடக்கத்தின் தரத்தையும் மொழியின் தரத்தையும் பேணிவந்த ஒரு பத்திரிகை. உள்ளடக்கத்தின் தரமோ, மொழியின் தரமோ குறைந்த கட்டுரைகளை அந்தப் பத்திரிகையில் அந்தக் காலத்தில் பொதுவாக காண முடியாது. சின்ன வயதில் தரம் நான்கில் அரபு மொழியை இரண்டாம் மொழியாக படித்துக்கொண்டிருக்கும் காலத்தில் எனது நீண்ட கட்டுரையொன்று இப்படியொரு பத்திரிகையில் வெளிவந்தமையை எனது எழுத்துக்கு அருளாளன் அல்லாஹ் அளித்த உயர்ந்த அங்கீகாரமாக நம்பிக்கொண்டதோடு இதற்குப் பிறகு பயப்படாமல் எழுதலாம் எனும் தைரியத்தையும் அது எனக்கு கொடுத்தது. அல்-ஹம்து லில்லாஹ்.

சுமார் 31 வருடங்களுக்கு முன் எழுதிய இந்தக் கட்டுரையே அரபிலும் சரி பிற பாஷைகளிலும் சரி அடியேன் எழுதிய முதல் கட்டுரையாகும்.

அஷ்-ஷைக் அபூ அவ்வாப் ஹனிபா அப்துல் நாஸர்

1441.01.13
2019.09.14