பொறாமைக்காரர்களுக்கு இமாம் ஷாபிஈ (ரஹிமஹுல்லாஹ்) அவர்களின் பொன்னான பதில்

தலைசிறந்த அறிவு மேதை ஷாபிஈ (ரஹிமஹுல்லாஹ்) அவர்களின் அபார அறிவு, அற்புதமான ஆற்றல், பல்துறை ஞானம், வியத்தகு விளக்கம், அசாதாரண புலமை முதலியவற்றைக் கண்டு அவ்வியம் கொண்ட சிலர் இமாம் அவர்கள் மரணித்துப்போனால் நல்லதே என ஆசைப்பட்டனர். இந்த ஆட்களை இமாம் அவர்கள் விட்டுவைக்கவில்லை. கொடுத்தார்கள் கவிதையால் சுடச்சுட. அந்தக் கவிதை இன்று உங்களுக்கு விருந்தாக:

تمنى رجال أن أموت وإن أمت - فتلك سبيل لست فيها بأوحد
وما موت من قد مات قبلي بضائري - ولا عيش من قد عاش بعدي بمخلدي
لعل الذي يرجو فنائي ويدعي - به قبل موتي أن يكون هو الردي

மேற்படி வரிகளைத் தமிழாக்கினால்:

நான் மரணித்துப்போக வேண்டுமென சிலருக்கு ஆசை
நான் மரணித்தால் அதுவுமோ நான் நிகர் இழந்தவனாக இல்லாத பாதை
எனக்கு முன் மரித்தவரின் மரணம் எனக்கு தீங்கு செய்யக்கூடியதுமல்ல
எனக்குப் பின் வாழ்பவரின் வாழ்வு என்னை நிரந்தரமாக வாழவைக்கக்கூடியதுமல்ல
என் இறப்புக்கு முன் என் இறப்பை ஆசிப்பவர்
அவரே எனக்கு முன் இறக்கலாம்

அபூ அவ்வாப் ஹனிபா அப்துல் நாஸர்

1439.07.25
2018.04.13